Я не з’яўляюся заўзятым фанатам франшызы X-COM, аднак прайшоў некалькі гульняў гэтай серыі, у тым ліку Enemy Unknown, з вялікай цікавасцю. Калі Steam у чарговы раз выставіў на распродаж The Bureau: XCOM Declassified c 75% зніжкай, я плюнуў ды набыў гэту гульню насуперак усім негатыўным водгукам. Бо вельмі мяне прыцягнуў сэтынг 1960-х гг.

Праходжанне гульні разам з DLC Hangar 6 R&D заняло 37 гадзін, якіх я зусім не шкадую. Па гэтай прычыне я і вырашыў напісаць гэты агляд: а што як знойдуцца людзі, якія дарма прамінулі гэту гульню з-за невысокіх рэйтынгаў і масы негатыўных водгукаў.

Наймацнейшы бок The Bureau — гэта атмасфера. Прайшоў гульню некалькі тыдняў назад, але дагэтуль перад вачамі стаяць уражальныя карціны: разбураны іншапланетнікамі горад, падпаленыя «Шэрманы», велізарныя заркалёты чужынцаў, праходзячыя праз партал у дамбе. Лакацыі цалкам лінейныя, але з пункту гледжання хараства і ўвагі да дробязяў прапрацаваны на ўсе 100%. Адчуваецца, што кожны элемент, пачынаючы ад абваленых будынкаў і сканчаючы пудзілам на гародзе, ручна прапрацаваны. Увогуле варта адзначыць, што нездарма распрацоўнікі перамясцілі дзеянне ў 1960-е гг. Класічныя касцюмы, раскошныя аўтамабілі, тэхналогіі сярэдзіны стагоддзя і адпаведная музыка лашчаць вока і слых аматарам рэтра. Фінальная кампазіцыя ды ўвогуле выклікала захапленне і мурашкі па целе.

The Bureau XCOM Declassified 01
The Bureau XCOM Declassified 02
The Bureau XCOM Declassified 03
The Bureau XCOM Declassified 04
The Bureau XCOM Declassified 05
The Bureau XCOM Declassified 06

 

Многія лаюць The Bureau: XCOM Declassified за капіяванне гульнявога працэсу Mass Effect. З аднаго боку, гэтыя вінавачанні маюць рацыю. З іншага боку, асабіста мне Mass Effect здалася вельмі нуднай і была кінута пасля пары вечароў. З «Бюро» сітуацыя зваротная: гульня была пройдзена на адным дыханні. Сам гульнёвы працэс, як ні дзіўна, вельмі блізкі да Enemy Unknown, толькі заміж пакрокавага рэжыму ў нас ёсць актыўная паўза.

У астатнім сутнасць старая:

  1. Зачышчаем лакацыі ад чужынцаў;
  2. Уздужваем галоўнага героя і каманду;
  3. Вяртаемся на базу, бегаем і балбочам з яе насельнікамі, адначасна выконваючы міні-квэсты.

Што да баявой сістэмы, тое рэкамендую адразу паставіць максімальную складанасць. Пры пэўным складзе каманды ды слушнай прапампоўцы, прыхадні ледзь аказваюць годны супраціў. Складанасці могуць паўстаць толькі ў тым выпадку, калі вы гоніцеся за выкананнем усіх дасягненняў, бо некаторыя з іх вельмі хардкорныя, але ў той жа час не вар’яцкія, як гэта часта бывае ў іншых гульнях.

Увогуле да бітваў прэтэнзій амаль што няма. У рэдкіх выпадках вар’ююць паводзіны напарнікаў, рэспаўн ворагаў за спінай ці проста на галаву, а таксама незбалансаванасць некаторых эпізодаў (асабліва гэтым грашыць DLC).

Сюжэтная лінія, мякка кажучы, невыразная. Быццам бы няма нічога складанага ва ўсіх гэтых элірыюмах, вытоках і лунатыках, але ўсё падаецца гэтак няўмела, што ўсачыць за матывамі і логікай паводзін галоўных герояў вельмі цяжка. Магчыма, рэч у тым, што недзе з сярэдзіны гульні я пачаў пракручваць усю гэту балбатню на базе. А што яны ад мяне хацелі? Гутаркі занадта зацягнуты, прапанаваны выбар рэплік, у адрозненне ад таго ж Mass Effect з’яўляецца фікцыяй і працуе па-сапраўднаму толькі ў пары-тройцы сюжэтных момантаў. І ўвогуле ўсё тое, што адбываецца на базе — гэты самы нудны і бескарысны геймплэйны час. Распрацоўнікам належыла б замяніць увесь гэты складальнік. Напрыклад, зрабіць магчымым уплыў гульца на даследаванне і вытворчасць новай зброі, развіць ідэю аўтаномных місій і г.д. Але, ведаючы якімі складанасцямі суправаджаліся распрацоўка і выхад гульні, пакінем гутарку пра гэта.

Калі атмасфера і role-playing у гульнях для вас важней, чым насычаны геймплэй і галавакружны сюжэт, то дачакайцеся 75% зніжкі і пагуляйце ў The Bureau. Яна як старое кіно: прыгожыя дэкарацыі, але немудрагелісты сюжэт, крутыя героі, але просталінейныя ўчынкі, месцамі захапляльна, месцамі можна заснуць. Як вынік, настойліва рэкамендую гульню аматарам рэтра, а таксама фанатам X-COM, якія не супраць зірнуць на франшызу з незвычайнага пункту гледжання.